1. Jesu, Rex admirabilis,
Et triumphator nobilis,
Dulcedo ineffabilis,
Totus desiderabilis,
Totus desiderabilis.

2. Nec lingua potest dicere
Nec littera exprimere,
Experto, potes credere
Quid sit Jesum diligere,
Quid sit Jesum diligere.

3. Jesu, dulcedo cordium,
Fons vivus lumen mentium,
Excedens / omne gaudium,
Et omne desiderium,
Et omne desiderium.

4. Rex virtutum, rex gloriæ,
Rex insignis victoriæ,
Iesu, largitor gratiæ,
Honor caelestis curiæ,
Honor caelestis curiæ.

5. Te caeli chorus prædicat
Et tuas laudes replicat.
Jesus orbem lætificat
Et nos Deo pacificat,
Et nos Deo pacificat.

6. Jesus in pace imperat
Quæ omnem sensum superat.
Hanc semper mens desiderat
Et Illo frui properat,
Et Illo frui properat.

7. Jam prosequamur laudibus
Jesum hymnis et precibus
Ut nos donet cælestibus
Cum ipso frui sedibus,
Cum ipso frui sedibus.

8. Jesus, flos Matris Virginis,
Amor nostræ dulcedinis,
Laus tibi sine terminis,
Regnum beatitudinis,
Regnum beatitudinis.

9. Te nostra, Jesu, vox sonet,
Nostri te mores exprimant,
Te corda nostra diligant
Et nunc et in perpetuum,
Et nunc et in perpetuum.